O neno pastor que venceu o lobo

LEMBRANZAS DUN GALEGO EMIGRADO EN CATALUÑA.

Olegario Sotelo Blanco fai unha revisión das súas vivencias a través dun texto ameno e ateigado de momentos de interese para o público lector. A figura singular de Sotelo Blanco é sen dúbida un referente histórico, pois se trata dun dos máis importantes editores independentes en lingua galega que xorde tras a ditadura.

O autor dimensiona as anécdotas e os eventos de carácter persoal inseríndoos nas diferentes épocas que lle tocou vivir e nos lugares polos que transitou, resultando así unha lectura dinámica e entretida, ademais de mostrarnos con honestidade a súa dimensión humana.

A fortuna quixo que este neno pastor nado en Quintela de Mazaira, Ourense, emigrase a Cataluña durante a primeira etapa do desarrollismo franquista. Alí coñeceu unha sociedade na que viu reflectidos os desafíos da súa amada Galicia en canto nación política e cultural.

A prologuista deste libro expresa con sagacidade o carácter que define o autor: «Devece pola súa terra e sempre lle pesou dalgún xeito a súa condición de ausente. Creo que a súa visión da emigración e a súa experiencia existencial como emigrante fraguaron nel unha personalidade controvertida que non sempre é ben comprendida na propia Galicia.»

Este libro abre unha xanela ás facetas máis íntimas de Olegario Sotelo Blanco a través das que podemos comprender mellor o talle real deste labrego editor.